XƏBƏRLƏR
- 27/11/2012 Azərbaycan Milli QHT Forumu “Əlillərin və Sağlamlıq İmkanları Məhdud Olan İnsanların Hüquqlarının Müdafiəsi və Onların Cəmiyyətə İnteqrasiyası” layihəsi
qhtxeber.az// 27 noyabr tarixində Azərbaycan Milli QHT Forumu “Əlillərin və Sağlamlıq İmkanları Məhdud Olan İnsanların Hüquqlarının Müdafiəsi və Onların Cəmiyyətə İnteqrasiyası” layihəsi çərçivəsində Binəqədi Rayon İcra Hakimiyyətində növbəti seminarını həyata keçirib.
qhtxeber.az-ın məluamtına görə tədbiri giriş sözü ilə Binəqədi Rayon İcra Hakimiyyətinin başçısının müavini Vüsar İsmayılov açaraq tədbirin mahiyyəti haqqında iştirakçılara məlumat verib. V.İsmayılov öz çıxışında rayonda mütəmadi olaraq tikinti-quruculuq, abadlıq işləri aparıldığını və bunun nəticəsi olaraq Azadlıq prospektində 6 zolaqlı yol xəttinin çəkilişi və məhz bu yolun bir xəttinin əlillər üçün nəzərdə tutulacağını bildirib: “Əlillərin vəziyyəti daim İcra Hakimiyyətinin diqqət mərkəzindədir”.
Milli QHT Forumunun prezidenti Rauf Zeyni çıxış edərək bu layihəyə dəstək verdiyinə görə Əmək və Əhalinin Sosial Müdafiəsi Nazirliyinə, tədbirin keçirilməsinə razılıq verdiyinə görə Binəqədi Rayon İcra Hakimiyyətinin başçısı cənab Xaləddin İsgəndərova və kollektivinə minnətdarlığını bildirib.
Rauf Zeyni layihə haqqında qonaqları ətraflı məlumatlandıraraq qeyd edib ki, layihədən əsasən əlilliyi olan uşaqlar və onların ailələri, sağlamlıq imkanları məhdud olan insanlar, o cümlədən müvafiq dövlət, icra və bələdiyyə qurumları, hüquq mühafizə orqanları, vətəndaş cəmiyyəti və media, eləcə də bütövlükdə ictimaiyyət faydalanacaqdır: “Layihə çərçivəsində həyata keçiriləcək seminarlar və maarifləndirmə tədbirləri nəticəsində nəzərdə tutulmuş əlilliyi olan insanların sosial, hüquqi, psixoloji, mənəvi və fiziki hüquqlarının qismən təmin olunaraq yerlərdə, dövlət idarələrində, mənzil-kommunal xidməti müəssisələrində, bələdiyyələrdə, icra hakimiyyəti idarələrində və digər qurumlarda əlilliyi olan insanların mənafelərinin və hüquqlarının qorunması hallarına daha həssas yanaşılacaq”. Tədbirdə Əmək və Əhalinin Sosial Müdafiəsi Nazirliyinin Əlillərlə bağlı dövlət siyasəti sektorunun müdiri İsgəndər Mustafayev də çıxış edib və bu sahədə dövlət siyasətinin istiqamətləri və priaritetləri haqqında qısa məlumat verdi və vətəndaş cəmiyyəti institutlarının, QHT-lərin fəaliyyətini dəstəklədiklərini nəzərə çatdırıb. Daha sonra Əlil Təşkilatları İttifaqının sədri Davud Rəhimli, Sosial Hüquqların Araşdırılması İB-nin sədri Mayis Əliyev, Vətəndaşların Sosial Rifahı Naminə İB-nin sədri İradə Rizazadə, “Həsrət yolu” Əsir və Girovlara Kömək İB-nin sədri Esmira Orucova və başqaları çıxış edərək mövzuyla bağlı öz fikirlərini bildiriblər. Tədbir zamanı həmçinin sağlamlıq imkanları məhdud olan insanların şikayətləri də dinlənilib.
Qeyd edək ki, Azərbaycan Respublikası Əmək və Əhalinin Sosial Müdafiəsi Nazirliyinin maliyyə dəstəyi ilə il ərzində həyata keçiriləcək layihənin məqsədi əlillərin və sağlamlıq imkanları məhdud olan insanların qanunvericiliklə müəyyən edilmiş bütün sosial-iqtisadi,siyasi,şəxsi hüquq və azadlıqlarının təmin olunmasına dəstək vermək,həmçinin onların ləyaqətinə hörmət edilməsini təmin etmək və eyni zamanda onların hüquqlarının qorunmasını təşkil etməkdir.
Bu xəbər 3233 dəfə oxunub
1.jpg)
