Narkoloji tibb müəssisələrində təhlükəsizlik tədbirlərinin tətbiq edilməsi Qaydasının təsdiq edilməsi haqqında
AZƏRBAYCAN RESPUBLİKASI NAZİRLƏR KABİNETİNİN QƏRARI
"Narkoloji xidmət və nəzarət haqqında" Azərbaycan Respublikası Qanununun tətbiq edilməsi barədə" Azərbaycan Respublikası Prezidentinin 2001-ci il 17 sentyabr tarixli, 581 nömrəli Fərmanının icrasını təmin etmək məqsədi ilə Azərbaycan Respublikasının Nazirlər Kabineti qərara alır:
1. "Narkoloji tibb müəssisələrində təhlükəsizlik tədbirlərinin tətbiq edilməsi Qaydası" təsdiq edilsin (əlavə olunur).
2. Bu qərar imzalandığı gündən qüvvəyə minir.
Azərbaycan Respublikasının Baş naziri A. RASİZADƏ
Bakı şəhəri, 12 avqust 2002-ci il
№ 132
Azərbaycan Respublikası Nazirlər Kabinetinin
2002-ci il 12 avqust tarixli, 132 nömrəli qərarı ilə
TƏSDİQ EDİLMİŞDİR
Narkoloji tibb müəssisələrində təhlükəsizlik tədbirlərinin tətbiq edilməsi
QAYDASI
1. Narkoloji tibb müəssisələrində təhlükəsizlik tədbirləri (müəssisələrdə işləyən tibbi heyətin və xəstələrlə əlaqədə olan digər şəxslərin narkoloji xəstələr tərəfindən törədilə biləcək təhlükəli hərəkətlərdən mühafizəsi) həmin müəssisələrin rəhbərliyi tərəfindən həyata keçirilir.
2. Narkoloji tibb müəssisələrində təhlükəsizlik tədbirləri xəstənin və onun yanına gələn yaxın qohumlarının hüquqlarını pozmamalıdır.
3. Xəstə tibb müəssisəsinə daxil olduqda palatada yerləşdirilməli və 3 gün müddətində ciddi nəzarət altında olmalıdır. Onun səhhəti həkim tərəfindən qiymətləndirilməli, daxili rejim və təhlükəsizlik qaydaları ilə xəstə tanış edilməli və bu qaydalara riayət edilməsi barədə ondan yazılı iltizam alınmalıdır.
4. Alkoqol və ya intoksikasion psixozlu xəstələrdə düşüncə pozuntuları olduğu halda, onun sağlamlığını qorumaq məqsədi ilə yataqda fiksə edilə bilər.
5. Narkoloji tibb müəssisələrində xəstələrin şöbədənkənar hərəkətləri məhdudlaşdırıla bilər.
6. Müalicə olunan xəstələr onların psixoloji vəziyyəti, spirtli içkilərə, narkotik və psixotrop maddələrə meyllərinin olması nəzərə alınaraq, tibb işçilərinin daimi nəzarətində olmalı, onların yanına gələn şəxslərin kimliyi aydınlaşdırılmalı, sayı məhdudlaşdırılmalı və gətirilən ərzaq və s. əşyalar yoxlanılmalıdır.
7. Müalicə olunan xəstənin yanına gəlmə vaxtı və müddəti daxili qaydalar əsasında məhdudlaşdırılır və bu xəstəyə kəsici, iti əşyaların, şüşə qabların, psixoaktiv maddələrin gətirilməsi qadağan edilir.
8. Narkoloji tibb müəssisələrində daxili rejimə və təhlükəsizlik tədbirlərinə əməl olunmasına bölmə rəhbəri, növbətçi həkim və növbətçi tibb personalı cavabdehlik və məsuliyyət daşıyırlar.
9. Tibb personalı tərəfindən daxili rejim və təhlükəsizlik tədbirlərinə riayət edilmədikdə, qanunvericilikdə müəyyən olunmuş qaydada tədbirlər görülə bilər.
10. Psixi pozuntuları olmayan, müalicəyə könüllü müraciət edən narkoloji xəstələr tərəfindən daxili rejimə və təhlükəsizlik tədbirlərinə əməl edilmədikdə, onlar narkoloji tibb müəssisəsinin rəhbərliyinin qərarı ilə xəstəxanadan xaric edilə bilərlər.
Qeyd.Yetkinlik yaşına çatmamış narkoloji xəstələr, habelə özlərinin və ətrafdakı şəxslərin səhhəti və həyatı üçün təhlükə yaradan narkoloji xəstələr digər xəstələrdən ayrı yerləşdirilirlər.